زجل:
"امشا الود"
أمشا بين الناس الود
ما بقا ف الخيار ما تعد
كيت اللي ما ليه حد
فين اما مشا يتطرد
أوكل باب عليه يتسد
مسكين يجري ويتنهد
عايش عيشت النكد.
مال دنيتنا تلونات
بلوان غريبة علينا
انفسنا منها نفرات
ماشي عليها تربينا
ليام الزينة مشات
اللي رسموها والدينا
هجرنا لكتاب والأيات
أوهدي الرسول نبينا
لا وفا لا عدل لا صفا
ميزانا امعوج الكفا
صروفو موضرا تالفا
اوماليه خصام ومخالفا
الأمة كلا شاد لو طريق
اوطانها مفرقة تفريق
لعداوة بين الخو الشقيق
وعند لعرب زاد الضيق
الخنق والقتل والحريق
الظلم والحبس بلا تحقيق
يا النايم الغافل إمتا تفيق
ما بقا ف الوقت ما يليق
حرمة القدس ولات معلقا
بقوال بهتان الزور لملفقا
أوبعضين زادوه الهم والشقا
من اللي باعو وتقبو الورقا
نشبو لعداوة بينا يا لخوت
ما بقا العربي على خوه يموت
كلا يگول غير راسي وتفوت
صبحنا نعيشو عيشت الحوت
شتانا غزيرة وثمارها خاويا
وخيرنا كثير مشا فالمتاويا
الله يحفظنا من ليام الجايا
ايام عمية النفوس الغاويا.
بقلم.
محمد السوارتي الادريسي
