"الدنيا"
خممت وبعد تخمامي
خرجت بلا إفادة
كثرات همومي وسقامي
وحياتي ولات نكادة
قضيت سنيني ويامي
عاش كيف الزوادة
واش الدنيا عواجت
ولا اماليها
ولا أنا فلس قديم
ما دايز فيها
ولا عقلي صبح غشيم
ما صالح ليها
سولت هل الري والتحكيم
خبروني باللي فيها
كالو الدنيا بحر عظيم
تصاحب اللي يعوم فيها
ناسها أماج عاتيا قويا
وللي ما يعرف يعوم
إغرقوه ومشي رزيا
وزدوه باللغيط واللوم
طول النهار والعشيا
الصدق والمعقول عابو
والحق والنية عنا غابو
الباطل وصحابو سابو
والناس كلا سد بابو
كلا زير وجمع قرابو
كلا مضا سنانو ونيابو
ليك الله يا مول النية
العالم بالحال والمخفية
بقلم.
محمد السوارتي اﻹدريسي
زجلية 💮 الدنيا 💮 للشاعر المبدع ذ . محمد السوارتي .
ردحذفhttps://majarrat.blogspot.com/2020/06/blog-post_75.html