زجل:
 " الدنيا حظوظ "
الدنيا حظوظ وزهر
مقسمة من رب لفجر
شي جاتو بالغنى والفشر
وشي ركلاتو عطاتو بالظهر
شي في العز والجاه يتخنتر
وشي بالفقر يتكدد ويتحسر
شي حاكم يصول يجول يتبختر
وشي محكوم ما يقدم ما يوخر
الدنيا احنا ماليها بالعقل نقضيها
بالمحبة والطيبة والخير نحييها
وقليل العقل عشتو خسارة فيها
أما لحمق معدور ما حاس بها
العقل للدين والشرع أساس
وللحياة ميزان ما يخلي بخاس
به يصفى الود ونبل اﻹحساس
ويزيان المجمع وحب الناس
به تبرا النفوس من الوسواس
عيار يفرق بين الدهب والنحاس
شحال من كلام اتقال عل الدنيا
والدنيا كيف خلقها الله هي هي
شمسها ضاوها وكمرتها باهية
واربيعها منور بزهارو الراقيا
خضر امخضر بويدانها الجاريا
تعشقها العين وتحلى لمساريا
لولا مكر بنادم وشرو المدفون
بنيتو الناقصة وعقلو المغبون
وغوايت ابليس ونزغو الملعون
لعاشت الدنيا بسلام مضمون
وتبقى الدنيا حظوظ وزهر
عطية مقسمة من رب الفجر
العاقل اعيشها شريف حر
والجاهل جهلو سباب الضر
                 بقلم.
            محمد السوارتي اﻹدريسي