صدمة مغترب
شو بدي أحكي وماحكيت
عنك ياضيعة وماوفيت
جيتك وَدّع أهل البيت
جيتك ولهان وغَنّيت
سكرت بحبك بعدا صحيت
لقيت الحاضر شكلو مقيت
مسحت دموعي وبعدا بكيت
ريتني ماجيتك ياريت
*********
بالضيعة شوفوا شو لقيت
حبابي رحلوا وهجروا البيت
وسنونو العشعش بالحيط
وسراج ال فيه تضويت
مفبَّر , لافتيلة ولازيت
والشهدا كيف ماطليت
مسحت دموعي وبعدا بكيت
ريتني ماجيتك ياريت
******
برمت الضيعة بس مالقيت
لاصحابي ولا ربع البيت
ولا البنت اليوما حبيت
ولا الجارة المعها تربيت
مسحت دموعي وبعدا بكيت
ريتني ماجيتك ياريت
******
كتار الماتو وأنا مادريت
زرت قبورك مااستثنيت
كل يلي اندفنوا وماجيت
وينك بَيّي , وينِك أمي
وينك جدي , وينك عمي
أنتو حبابي وروحي ودمي
صرخت وخَبَّطت وناديت
صدى صوتي وحدو لقيت
بلعت الجرعة وتمنيت
لو أني ماعدت البيت
مسحت دموعي وبعدا بكيت
ريتني ماجيتك ياريت
*******
وصل اليوم ال فيه نويت
عالرجعة وع وداع البيت
عَ جبل السايح عَدّ يت
وعَ تلال الضيعة طليت
زرت بنظري بيت وبيت
الجوزة, السهلة, الدلبة, الحيط
فيها قرنة ماخَلّيت
ماشفت البنت الحبيت
وأمي ال عَ أيدا تربيت
حملك ياضيعة تمنيت
من العالي صرخت وناديت
ليش يابابا مارديت
ركعت وسبَّحت وصليت
تعبت وعالأرض استلقيت
ناديت وبعدا استنيت
صدى صوتي كل مالقيت
مسحت دموعي وبعدا بكيت
لوَّحت بإيدي وفَلّيت
ريتني ماجيتك ياريت
********
ركبت الطيارة وغميت
وصلت المهجر , صرت بعيد
من الصدمة بعدي ماصحيت
أحبابي وأهلي مانسيت
ريتني ماجيتك ياريت
رفعت خوري
إسبانيا
قصيدة 😰 آخر دمعة 😰 للشاعر الزجال . ذ . رفعل خوري
ردحذفhttps://majarrat.blogspot.com/2020/09/blog-post_9.html