قصيدة جديدة..... ( لحلوف )
ياك حنا كنا خاوى
كنا عشران وصحبة
لكتاف يسند لكتاف
نتحداو الظروف الصعبة
ملي عرفو دوك لكفوف
مجموعة ع لمحبة
باعونا بثمن الصوف
باعونا فسوق الرحبة
حسبونا بهيمة حلوف
على ظهورنا حلات الركبة
كًودونا كيف المكفوف
ودموع العين حرة شهبة
شافونا وطول ف الشوف
كل شوفة وراها رهبة
شربونا من كأس الخوف
عسل حلاوته كذبة
قالو هذي احكام الظروف
وأحكامها شطيح وجدبة
عليهم بالخير تروف
وعلينا بالف سبة
زرعهم منقي ملفوف
ف وراق الزهر والمحبة
وزرعنا داب ف لكفوف
قبل ما تفرق ديك الصحبة
حلفو لينا ب لحلوف
حتى تساوى هاذ الركبة
12 10 2020
الإدريسي محمد
ليست هناك تعليقات:
إرسال تعليق