زجلية مغربية **مجدوبة**
الما طاب وخرج السبولة
وهذاحالي وأنا مولاه مكبلة مغلولة
كالوا حمقى، كالو معلولة،ولا مهبولة
كالو بوهالية مزغوبة
وانا أمولى نوبة مجدوبة
وسخية يدها مثقوبة
من الشرفة نشربو الماء بالسبولة
و نخلط الحناني ونطلي حالي
ونزند الفاخر ونشعل المجامر
ونطلق الجاوي ونرمي المباخر
العود القماري ، والقفطان اخضر مَبَّرْ
سليلة الشرفة ، وجدي المخنتر
ملي نسمع الليرة ،نجدب و نتحير
نطلق سوالفي ونحل الظفيرة
نصلي على النبي ونذكر السيرة
والمقصود الله ونذبح النحيرة
الله حي . الله دايم ، مع التكبيرة
نتحير و نجدب ونطلب ربي الجبيرة
رجاي فمولاي يجبر النفس الكسيرة
وهذا حال كل مجدوب ومجدوبة .
زهرة لمهاجي.
المغرب.
ليست هناك تعليقات:
إرسال تعليق