زجلية 🚫 حالنا ما هو حال 🚫 للشاعرة المبدعة ذة . سميرة اشويميج .

 حالنا ماهو حال

شفت  حالنا

  ما هو حال. 

والدنيا ف حالنا

  حالها ماتلا يعجب؛ 

اقوى فيها 

لقيل ولقال. 

و كثرة لمراود

   لشوف  كتحجب؛

الجيد فيها

 دگو قلال. 

والجودة

   شلالها ماتلا  يكب؛

ولحلال خبزو 

     ماتلا يتكال.

و لحرفي قليل

             لفيه يرغب؛

ولحرام غادي

سارح  كيف لغلال. 

 فحزة ابليس

            تريكتو كتلعب؛

ولحق تعگد

  لسانو و تقال. 

والداوي يحلف

      بيه وهو يكذب؛

ولباطل شحال

  گرح شحال

وبزيمو قاصح

         شلا عباد اضرب ؛

  والجهل 

 غ مازاد جهال.

مخرج عينيه

         يفتي ويخطب؛ 

باب الجورة

دارو لو لقفال. 

وگلب الجورة

          بابو ولى خشب؛ 

  لخاوة ياخيي

خاطرها جفال. 

والدم تخلوض

           وابرد لو لگلب؛ 

والوالدين

كثر عليهم جدال

كرم غرسهم 

                ولى شطب؛ 

وشبان لاجرية

ليل وماطال

 غ واقفين 

           ف راس الدرب؛ 

كلشي 

مساس و بسال.

لحيا طار

والحشمة

        ماتلات تتنگب؛

والكلمةما بقى

   فيها مايتگال؛ 

شدت الركنة

          كتطل وترگب؛

واصبح حالنا

   ماهو حال.

كفة لوزان

           ميزانها تگلب؛ 

 وحتى تغييير

ماشي محال.

بتعاويد ترابي

    كلشي لاصلو يعگب؛

و تزيان ليام

ويبياض لكحال.

ويحيد لبغض

وتصفا لمجالب الحب؛ 

ويثمر الغرس

من بعد ماقحال.

ومن عين المحبة

         كلشي غ يشرب؛ 

 سميرة محمد اشويميج