رد بالك ..
واياكْ تشَدْ فلحبل الرّاشي أو تعوّل عليه .. أو الكلب النَّبَّاح كيعرف مَّاليه . .
لي كيتفرَّج ضاحكْ .. ولي كيشطح ما راشقَة ليه .
واحد لابس سلهام دالصوف .. أو واحد حفَّى عينو يخيط فيه .
الجَّنْ داخل سوق راسُو .. أو الرّاقي سايَرْ ايرَقي فيه .. لا ساكن لا مسكون والحال ليه مّاليه .
الفكاهة ديال الريكلام .. عليها الزْحام .. ولِّي كيتفرج الضحك فيه .
الى شفتي الحية تحَركاتْ .. عْرف بلي الغاشي دايزْ .. أو هيَّ سايرة تتربْص ليه .
النحلة ما تحطْ غيرْ قالنْقَى .. أو الدبانة فين ما كان لوسَخْ تْقلبْ عليه .
الرَّقاص حامل لكلام .. ايزوَّق فيه .. بايع شاري ..الخَاسْرة ليهم أو الرَّابحَة ليه .
العلام راكب عْلا عود دْهَم .. أو لبَّاردية دقتهم ما مساويَة .. أو السَّربَة عوجَة .. أو العَمَّار .. البارود ما خاطيه .
والشوفة القاسْحة موراها قلب قاسي .. والقلب يقْسَاح حتى يقساح ويهَرْسو قاع الكاس .. والنعناع ايضَرْقو ويغَطِّيه .
الى شفتي اللغيط كثار .. عرف بلي السوق خَاوِي .
وِلا عَمْ الصمت .. اعرف بلي الضربة قرْبَات .. ولِّي حاول على حْمِيرو يحج عليه .
لكلام كثير .. او الودنين سَمَّاعة .. أو كولا يفهم على قدُّو .. أو كلامي مع مَّاليه .
( الحساني عبد العزيز )
ليست هناك تعليقات:
إرسال تعليق