//زجلية مغربية//
فرطاس الحوالة.
كانت للا و للاك و ما زااالة
همة و شان و متولة توالة
زينة البسمة و الرݣبة و الحالة
ياك الزين و العقل فينا سلالة
من الجدة و الميمة و زيد الخالة
بحسها من بعيد حيرت الرجالة
بݣربتها مويها نقية صافية زلالة
و لخبيزتها في الحلال و كالة
آش داك دور بساحة الغزالة
و انت غير حياح صياد النعامة
الغزالة زينها ضربوا بيه المثالة
ما يفوز بيها غير سبع و معلم نبالة
ماشي رعواني مجرتل مقطع النعالة
شفقت عليك يا ذاك ذليل الرجالة
دير لفمك لجام و زيد لو الكمامة
صعيب ماعندك ضروس للحم الغزالة
وللاك الحرة لبية ماشي بغلة ركالة
تواجه وتحارب الذل و البهدالة
وبالمعاني ترد عليك حادݣة زجالة
وبالقوافي يلا حكيت نحاسها سجالة
واللي دق ياكل الدق و يزيد ݣبالة
سبقوك للسوق و ما رضاو الدلالة
راك مغشوش ماشي صردي الحوالة
وجيت للشاوية رمى و عز و خيالة
وبغيت تبورد على ظهر السواحلة
فينا نخوة اولاد حريز ونخوة جبالة
وعز سواسة وقرى تاريخ اللوالة
وزيدك العزارة سيادك التوالة
شفقت عليكم يا دوك الولوالة
بالنفاق والزور لعابة و كوالة
فيقوا بعيبكم يا عقل الهبالة
راكم وليتو بحال المرا الهجالة
تعرى ماعونكم، وطارت القفالة
وشواريكم عامر كذوب حمالة
ها العطارة ها الحلايقية والدجالة
واش شطاح القرد يشطح الغزالة
واش عمرك شفتي شي درة عريانة
بلا حجاب، وخا شعرها حرير الكبالة
ياك اللي دار راسو في النخالة
ينقبو الدجاج و يرفسوه الخيالة
هذا كلام واضح ما داير جلالة
الحر بالغمزة و العبد بالدبزة القتالة
لمهاجي زهرة
المغرب
20//1//2021
أزال المؤلف هذا التعليق.
ردحذف