زجلية 👑 زواج النية 👑 للشاعر الزجال المبدع ذ . عبد العزيز الحساني

 

"""""""""" زْواجْ النِّية """"""""

الزواجْ مْحبَّة

ماشي مسَبَّة

الزواج زْريعْ فأرضْ خصْبَة

ماهُو صَفقَة فسُوق الدْلالة

شانُو عظيم فَعْيون الرجالة

أوفعينْ الرْعاوينْ لعْبَة

البَدْرَة الى كانتْ فسُوق لحْلالْ

سْبُولتْها ثَامرَة ما تَقلالْ

أولخَوْية فالنار تَهْبَة

الزواج مَعْطى ماشي مْحَطَّة

يرتاح فيها كل من يَخْطَى

أومني يَتْساراحْ يْغَير التربَة

هو بيتْ عَامرْ فْعِينْ الحُرَّة

أومثمورَة خاويَة فلِّي عينها جَمْرَة

أوعَشاقة ملالَة حْياتْها كذبة

هو أمانة ماضْيَة من جُوجْ جِهاتْ

عَشْ يجمع أوليدات ْ أوبنياتْ

ماشي كُورِي ولا خَرْبة

هو ميثاقْ ماشي طْلاقْ

ولا مهر غالي وصْدَاقْ

ولا عيشة حارَّة أومْغَبَّة

هو صْبر علْ لَمْحاينْ 

أوكُلا يَرْضى بَلِّي كاينْ

أوقطران لحلالْ ولا عسل الغربَة

عشْرَة صافية تْعَمَّرْ الرْكاني

أوعَتْبَة ما الدَّخَّلْ بَرَّاني

أوحْيوطْ مبنيَّة علْ لَمْحَبة

( الحساني )