زجل
مازال
كبرت الشيبة فراسي
وقفات هازة علام الهم
واش لونها جاجي...ولا...قلال عندي الشوف
طلقت الشيبة فكاسي
وكملت مرارها فالفم
حرمتني من لحلاوة.........حررت ليا الجوف
تجمعو بجوجات طيرو نعاسي
وحدة راوية بالدم
والثانية مداقها مر علقم
واش هوما خواتات.......ولا تشابهو فالحروف
واش غير انا لي معاهم نقاسي
ولا جمعو منا خوت وولاد العم
وتافقو يدوقونا.....جرعات من الخوف
أنا بعدا قطعت منهم اياسي
ما بقيت قادر تا نحلم
لي بغات تشرب من دمي تشرب
ولي نوات تزيد تحرر لساني تزيد
حيت قررت نكمل بالجري
كيفما كانت الظروف.
رشيد حياط....27/02/2022
ليست هناك تعليقات:
إرسال تعليق