زجلية & حروف من الجوف & للشاعر الزجال المبدع ذ . أحمد قيود .

 

زجلية بعنوان : 

حروف من الجوف

مَلِّي تْزَفْ رْيَاحْ لَخْرِيفْ ..

وتشير عل لعظام ...

تزيد تغرق وتعمق...

ف اجراح ليام..

وقبل ما اللگط إغيب..

و إقل الطعام...

وقبل ما يتشل الدماغ...

و اتسد لفام..

نعرف أش ليا ..واللي عليا..

ؤ اللي فَكْ اعشورو...ما يعرف ارزية..

أنا ماني فرادي...

ومگطع من شجرة..

أنا ف أصلي نعض...

ؤ يجرى اللي باغي يجرى...

اللي ما عرفني..أو ما حس بيا...

أو خلا الزمان...يضحك عليا...

الوقت اللي يكميني...وإتنشوا بيا .

إبوخني دخان...وعيونو محنيا..

وملي ف إيدو نقلال...

يرميني و يزطم عليا..

اللي ركلو الزمان بحالي...

ما يوقف..ما يكالي...

من اوراق الشجر ...إنج ملحاف..

ويطرزو بعروگ الصفصاف...

اللي بلوانو تصبغو شيبات...

وتزينو عيبات...

وعرگي نصرفو ورقات..

بهم نحزر لوقات..

بهم نتعز ..بهم نتهز..

بهم نعمر جوقات ...

الكف الرافضاه الحنة...

ما نبغيه إطبطب عل لكتاف..

والتوب لمرقع بالذل...

ما نديرو غطا ولا ملحاف..

يا همي لمغربني ...

فين سارح بيا؟..

هويني ضويني...

خليني نتنفس شويا.

إلى ضعت منك...

أش من دات تصبر ليك..

أش من دات تهز اهبالك...

وتتحزم ب احبالك..

الواشمة ف داتي فتلات ...

الكاوية گلبي كيات...

لمغرباني عل لوكار...

لمنسياني في لدكار ...

يا اللي إكمش الملحة...

ويگول بشحال الغاسول

راه ݣول ما يشبه ل ݣول...

08/11/2018