زجاية . & الفن & للشاعر الزجال المبدع ذ . عبد العزيز الحساني .

 "" الفن ""

الفن تْعَفَّنْ .. والطرب الأصيل تَّدْفَنْ ..كولشي  ولا يلحَّنْ .. والصوت النقي تمحَّنْ .. ريكلامْ لكْلامْ فالزْحامْ  .. حتى خاطري تشَطَّنْ .. سْمَيَّتْ فنانْ .. كتفرق بالمجَّانْ .. كي لعسل كي السمن ..

كان يامكان .. كان الفنان فنان .. فالرسالة يتفنَّن .. لحن أو طرب أوكلام  يجنَّنْ .. يخلي القلب يحَنْ .

القمر الأحمر أوراحلة .. بحال ألف ليلة أوليلة .. سمع أوتمعَّنْ ..

الأطلال أو مازال الحال ..الود والوصال ..والقلب يدندنْ ..

قصيدة الدمليج .. أوقصيدة لغزال فاطمة .. كلمة تنسيك فكلمة .. ماشي بحال لكلام لمروَّنْ ..

ما كاين باس .. أوعلاش ياغزالي .. أورجال الله .. موحال كل لحن تنساه .. روى فلمعاني أوخمَّنْ .

يابنت لمدينة .. أوباغيَ فلاحْ .. كلمات موزونة وصْحَاحْ .. ماشي كلام بالفقصة يطعَنْ ..

عمي يابياع الورد .. قتلوني عيون السود .. تسمع تحس بالوجود .. بعيد عن كلام يغبَّنْ ..

طالعة من بيت أبوها ..فوق النخل .. الحب كان من سنين .. ياسلام على رنينْ .. منو تتمكَّن ..

ليوم هاضاضيضاي .. ما فهمنا شايْ .واش غْنى ولا محنَة .

رخاص الفن .. واحد كيكتب . أوكايلحن . أوكيوزع . أوكيغني .. الله الله على ودْني ..نتمنى تسامحني ..راه منهم ماشي مني .. 

السنطيجة والجبهة كاينة .. الله برحمك ألغْنى .. وليتي عايش فمحْنَة ..

( الحساني)