زجلية $ الفتنة صبحات مفتونة & . للشاعر الزجال المبدع ذ . عبد العزيز الحساني .

 """" الفتنة صبحات مفتونة """"

الفتنة صبحات مفتونة ..

مني كلمت الحق صبحات مرهونة 

كثر لكلام .. فسوق الزحام ..

مني ولات لحروف فالسطور مسجونة

الغادي جاي او الجاي غادي ..

مني ولات الفرحة مغبونة

قسات ليام بحر الصهد  ..

أوسم لغلا خلا لفام زيزونة

البراح صمك أو السامع ضرير ..

أو سوارت السوق فيد عيطونة

الفتنة صبحات مفتونة ..

مني الخيمة ساكنة ما مسكونة 

اللمة لي كانت ملمومة ..

دخلات اللوزيعة بجناوي مسمومة

او الفتنة صبحات مفتونة ..

مني الحوت لكبير حاكماه شطونة 

أو لحبل إلى كان قصير ..

ما عمر العقدة تكون متقونة .

       "" الحساني عبد العزيز """