زجل
~~~
العْمَرْ
~~~~
يــــــاداكْ الــــــعْمَرْ وَشْـــحالْ
دَوَّبْــــــتيني بَــــــالـمْهَلْ عْبارْ
حــــــيتْ وَقْــــــتَكْ سَــــرَّابَة
حــــــيتْ مَــــــكْتابَكْ حْــكامْ
حــــــيتْ دْوايْــــــتَكْ رْسـومْ
زَمَّــــــمْتِني مَــــــنَّكْ حْـروفْ
مــــــَلِّي نَــــــتْفَڭَّدْ هَـــيْنونَكْ
شَــــــلَّا قَــــــصَّاتَكْ دَوَّاتْــني
شَــــــلَّا نَـــــقْشاتْ فَ الرَّاسْ
شَــــــلَّا مَــــــنِّي مَنَّكْ حْمومْ
مَــــــكْتابَكْ مَــــــكْتوبْ قْدارْ
مَــــــنْ تَــنْهيدْتَكْ فْ الْخاطَرْ
هــــــَزَّاتْ حْــــــمولْ تَـمَحَّطْ
هَــــــزَّاتْ دَقَّــــــاتْ تْــدَڭدَڭْ
هَــــــزاتْ مْــــــطارَقْ اللُّــومْ
شْــــــحالْ تْــوَحْشَكْ صَغْري
فْ ديــــــكْ ضْـحيكَة غـابْتْ
تَــــــوَحَّشْناها تْــــــعودْ مَرَّة
فْ لامَــــــة عَــــــزْ الــحْبابْ
فْ الــــــحْجَرْ الــــــمَرْحــومْ
فــــــينْ حَــــــسْ الـــــحْبابْ
تْعــــــيشْ الــــــدَّنْيا عْــــمارْ
وَتْــــــمَرَّغْ فْ مْــــــتاعْـــــها
مَــــــرَّة تْــــــطيكَكْ مْــشَهِّي
مــــــَرَّة تْــــــوَضْرَكْ الـهْمومْ
الــــــعْمارْ مَـــحْدودَة شْحالْ
ڭَــــــدَّكْ تَـــهْرَبْ مَنْ الحَفْرَة
نْــــــهايْتَكْ تَــــــمَّاكْ مْـكَفَّنْ
وْنــــــيسَكْ بْيـــاضْ عْمالَكْ
وَلَّا وْنـــــيسَكْ كْحَلْ مَرْدومْ
شْــــــحالْ يـالعْمَرْ غْزَلْتيني
صــــــوفَة مْـــسَدْيَة رْشوقْ
نَــــــجَّتْها الـــــنَّفْسْ هْرادَلْ
فَــــــرْشاتْها مَــرَّة حِيدوسْ
ؤُمَــــــرَّة حْــــــصيرْ الـدُّومْ
يــــــاداكْ الــــعْمَرْ المَقْدادْ
بَــــــخْنِي بْبَخَّاتَكْ نَــــجْدَبْ
عْــــــلى لِّي فْــــلَتْ تَحْصارْ
مَــــــرَكَّبْ عْــــــلى دْمـــيرْ
مَــــــركَّبْ عْــــــلى شُّـــومْ
عَــــــمْري مَـــــلْكْ الْـــعالي
عَـــــمَرْ عْـــــوامْ حْــــياتي
وَعْـــــمَرْ شْـــــريكَة زْماني
عـــــْلى الـــــحْلَوَّة وْالْـمُرَّة
عْـــــلى تَـــسْيافْ مَشْرومْ
يــــــاداكْ الــــعْمَرْ وَشْحالْ
تْــــــشَهِّيتْ الـــصْفا يْخَيَّمْ
تَــــــزْها الأيَّامْ بَــعْدْ الجْفا
تَــــــتْحَرَّرْ فَـلَسْطينْ وَتْهَنَّا
وْيَتْشَكَّمْ الصَّهْيونْ مَرْغومْ
تْــــــڭَادْ الْأحْــــوالْ بَـالهْنا
عْلى حَــــــرْفْ الــــمَكْتابْ
عْلى حَــــــرْفْ الــــــمْحَبَّة
تْــــــكَتْباتْ فْ الــــــمْواجْ
تْــــــكَتْباتْ عَـشْقْ مَغْرومْ
بقلم ذ.محمد حديش
~~~~~~~~~~~
13\01\2024
ليست هناك تعليقات:
إرسال تعليق