اولاد الناس .
*********
ابغينا ما تبقى خملة
و لا اخبال يكون لا تعكاس
نعيشوا الراحة بلا وحلة
ؤ ما يبقى عندنا باس
لبني الى كان ف الرملة
واش يطلع على أساس؟!
الحوض دون مياه و عتلة
واش يعطي غلة و اغراس؟!
الإصلاح بالنية جملة
من طبايع اولاد الناس
اصحاب التقوى والقبلة
و اضميرهم فايق عساس
بالصدق ولوفا خصلة
بالصفا يكون ساطع وقاس
بنكران الذات و الرجلة
بالأمانة و الإخلاص
الحس الوطني أولى
و المبادئ ما تتقاس
ما يكونوا اسباب الوحلة
ما يزطموا على حقوق الناس
يرميوا الأنا ف لخلا
يكونوا لحقوقنا حراس
يتمر بلوح النخلة
و يعم الخير ولا باس
يضمنوا حقنا ف الغلة
بحال هاذو راسهم يتباس
و لكذوب تديه الحملة
و اصحابو يطلعوا ف الراس .
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
عبدالرحمن ذكي .
ليست هناك تعليقات:
إرسال تعليق