***** من طريق لطريق *****
كنت مهني..
عايش فحياتي هاني
عايش كيف الناس.. لاباس
عارف طريقي.. حافظ الركاني
باني حياتي.. على ساس
ما نخمم بزاف.. معول ع لكتاف
ماني رقاص.. ماني زهواني
كنحلم على قدي.. أو كنعدي
أو حتى الحلم كان بلقياس
ناسي الهم.. أو مخليه ينساني
يجيني النعاس.. مني نحط الراس
ولا اتعطلت يستناني
قلت ما فيها باس
ندور دورة فدروب الناس
نعرف آشنو طاري
أو مني نعيا نرجع لعنواني
شديت الطريق أو قلت
إلى تلفت نسول
أو من مكان لمكان نتحول
أو نعرف آش كيتسناني
لقيت شي ناس
سيفتهم سيفت الناس
أو فعايلهم فعايل
الوسواس الخناس
أو أمرهم حيرني أو عياني
ما شادين حتى دين
غارقين فالذنوب
حتى للودنين
حياتهم تهراس فتهراس
كملت طريقي أو قلت
نبدل لمكان بالمكان
أو نعرف الباطل من اليقين
أو صلت لقوم
عايشين ف لهموم
أو الساكن فيهم براني
هازين الهم ع لكتاف
كيطحنوا فالطحين مطحون
يعجنوا لعجين أو هو معجون
أو همهم همي نساني
رحلت بالليل قبل النهار
بعد ما تلفوا ليا لسوار
أو تفكرت اهلي أو عنواني
كملت طريقي أو قلت
ياترى نلقى ناس
بحال الناس يشبهوني
نعرفهم ويعرفوني
أو عبارهم بلقياس
بان ليا الضو من لبعيد
أو قلت نتوكل
على الله أو نزيد
ما دام زادي كفاني
لقيت ناس
تاكل ما تشبع
غالب عليها الطمع
تدوي ما تسمع
عينهم ما تدمع
حالهم شفاني
سولتهم على الطريق
قالوا ليا زيد لقدام
بعيد على الزحام
بلا هم بلا تخمام
أو رجليك يكونو روام
هنا ع عرفت بلي كلامهم
كلام لمعاني
أو كلام لمعاني فيه الحكمة
أو معانيه تترك البصمة
كملت طريقي
واخ بانو ليا شلا طرقان
أو الواسع فيهم يبان
نقلب على الدليل أو البرهان
فقصة كان حتى كان
أو مرة مرة نتفكر عنواني
هنا عرفت بلي
الطريق طويل
واخ تمشي بنهار أو ليل
أو فين ما وصلتي
من ثم غادي تبدى
أو هاكذا حكاية
تركب على حكاية
أو فكل حكاية
ثم عنواني.
(عبد العزيز الحساني)
ليست هناك تعليقات:
إرسال تعليق