ثلج وحكايا ليل
(باللهجة العامية الرسم مطابق للفظ)
شعر: هاني زريفة
ثلج وحكايا ليل جَنْب الْموقدي
وِشْموع تُهْمُس لا بَقى تِتْنَهَّدي
يا حِلْوِة الْ حار الْهوى عَ دروبها
طَفّي لهيب الْقلب بلْكي تِهْتِدي
طارت زغاليل الْهوى من عشوشها
وِتْفَرفَطوا الْوردات والْحِلْم النَّدي
وما ظل غير الّليل وِدموع وأسىٰ
ودفتر حكايا سنين والْحَظّ الرَّدي
شو فاضت الدَّمْعات بين سطورها
وشو جَرَّحت فُلّ بخدود مورَّدي
وغيوم تُنتُف من أساها ثيابها
وِتْهِل دمعاتا السَّخايا مبَرَّدي
والرِّيح تِتأسَّى بمواويل النَّّوى
وكل ما خلص موَّال تِرجَع تِبْتِدي
وشبّاك ظَلّو يِنْتِظِر غَفْلِة عُمِر
نَسْمة حَبيب معَتَّقَة وِمْجَدَّدي
يِسَهَر مَعِك وِيْقُلِّك بليل الْجَفا
لُوْذي عن نسوم الهوا لا تْبْرُدي
مَرّ الزَّمان وبَدَّل ثيابو الهوى
صارت مِثِل جُنْح الْغُراب مسَوَّدي
وِتْحُوم فيكي سنين وِتْحومي مَعَا
لا كان فيكي تِقْرَبي ولا تِبْعَدي
ومِرجُوحة الْأحلام هَدهَدها الْجَوى
وحَبل الْوَصِل مَمْزوع لا تِتْجَوَّدي
