غير بلاتي بلاتي .
^^^^^^^^^^^^^^
الوهم اللي اسكن ف ذاتي
كان قاسي عليا عاتي
عيشني اعوام ف خدعة
دون هدف بلا مسعى
ف لمصايف و لمشاتي
اعقود ضاعت بلا رجعة
قضمت شظية من احياتي
ضاعت بحنظل معسول
و مهارة في فن القول
ثقت بيه من قلة عقلي
اللي ما افطن والا استوعى
وزادت منو جرعاتي
جرعة اتنسيك ف جرعة
والنتيجة حسراتي
يواعدني ونتسنى فيه
طامع منو بخيط اشعا
اضياه ينور ساعاتي
ما يوفي بوعدو ليا
ويقول لي اصبر بلاتي
حسيت بعدما فات الفوت
كنت انضيع ف أوقاتي
بقات فيا غير الشمتة
وذيك حتى لمحتحتة
وجعتني ب حر اللسعة
نوعى كون لعقيل وعى
ثقتي اسبايب علاتي
من وهم خلتو اضحك ليا
وزاد ازيان ف عينيا
ظنيت ازهات الدنيا
وكان غير يضحك عليا
كان ضامر سوء النية
وانا نايم ف اخيالاتي
يا البايع للناس الوهم
يجي اليوم اللي فيه تندم
ليام بيناتنا تحكم
وربي شاهد و عالم
شكون المظلوم و الظالم
غير بلاتي بلاتي .
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
بقلم : عبدالرحمن ذكي .
ليست هناك تعليقات:
إرسال تعليق