قصيدة زجلية غنائية يومية : بالعامية المغربية
دموعك لهطالة آلغدار ما ينشفوها زيوف
ديما لغدار تيتلفت وراه و يشوف
باين قصدو ظاهر و معروف
و لحمام فسماه طاير مشيوف
ما تيكتب ما تيقرا ما يعرف حروف
يدي و يجيب لخبار و ما مكشوف
ذيب بزاف صليب ما يخاف لخروف
كٓالو ناس زمان غير شوف تشوف
راك صبحت مفضوح و موصوف
لا تكٓول ظلماتني و عراتني ظروف
ريحتك من زمان زكمات كل نيوف
و خير شجارك سقط ما هو مقطوف
لا حد منو يقرب صبح عندهم معيوف
كٓالو ناس زمان حيط لغدر منسوف
علاش ألظالم داير ميزان بلا صروف
مروج لحقد وسط لحرير ملفوف
ما ضارب حسبة لعدل و لا لسيوف
مدوز حياتك فلكذوب و كثرت لهتوف
ظلمك ليوم ما يفيد و لو ترفد علكتوف
غدا تسكنك لهوال و فيك يكثر لخوف
طيح صروفك ترجعك لمواج مقدوف
يتلف ريك تولي تايه مضيوم متلوف
عليك يضحكون صحابك ذوك لألوف
لِي لبارح هما معاك ملي كنت معلوف
فيك واكلين و شاربين جميع ضيوف
ضيعت حق لميزان شتتي كل لحروف
و ببانك تحلات تهرسو ليها كٓاع دفوف
و حيوط رصامك رابو ولاو شقوف
تغريت بزاف كل حسابك ولى مكشوف
كنت حولي جيد ليوم تصرفت خروف
هزيل و ضعيف و كل صوفك منتوف
سلعة بايرة مهمولة عمرات رفوف
و لون وجهك ذبل رجع صفر مخطوف
عليك طلع نهار هداوي ساكن لكهوف
دموعك لهطالة آلغدار ما ينشفوها زيوف
و كلما نهبتيه لكريم يجعلو كلو مخلوف
الشاعر و الزجال الغنائي و القاص
ذ . بلعباس المختاى
