حكاية وسط حكاية ........
جبت حكاية من حداية
أو شحال من حكاية تفرقوا فيها لرزاق
أو شحال من حكاية رجعات حجاية
أو المنحوس غاب وقت التفراق
جلد البندير ديمة مجبد
أو الدلو فالبير مدلي خاصو لي يجبد
أو الخبز الحار عجينتو مغشوشة
أو كلام العار حروفو مرشوشة
كتعجبونا بالكلام وقت الزحام
أو منصبين راسكم علينا عساسة
البرمة مع الكسكاس روام
كتلبسوا لحرير أو تلبسونا لحلاسة
فوقت لبني كتكونوا غايبين
أو فوقت لهديم صايلين جايلين
كتعجبونا فالتبوريدة ع لحمير
أو العلام لباردي فيكم بصير
جبت حكاية من حداية
أو شحال من حكاية تشبكوا فيها لخيوط
تنواحكم تنواح العداية
أو الحر صبح فيكم مربوط
العيطة خالفات لعيوط
أو الفالطة لبسات الكبوط
أو القصة فيها مرود أو مراية
ولي يحكيها مسخوط
عزيز عليه العافية أو الجمر
أو فين ما لقى شي جمرة يسوط
لمكحلة رومية أو القرطاس عروبي
أو الصياد خاصو سلوگية
ماشي بوبي
جبت حكاية من حداية
أو خليت شلا حكايات
حتى نحكيهم فوقت من لوقات
أو حتى يتخاصم الدق مع السكات .
( عبد العزيز الحساني )
ليست هناك تعليقات:
إرسال تعليق