أنا لغريب.....
زجل
غريب يا مي فوطاني
واخا المهد من ترابو
غريب وانا فزماني
تهت وسط گافلة ذيابو
عييت نراسلو بمعاني
وشحال تسنيت جوابو
عطاني بالگفا وخلاني
حتى ظنوني فيه خابو
وليت نقول آش داني
نشكي على لي فقد صوابو
لي نجيه وما جاني
عاجبو نتألم بعذابو
شكيت بلي بويا نساني
بعدني من مجمع حبابو
لعناق لي تمنيت بيه يلگاني
فرقو حروف فظهر كتابو
حفظتو حفيظ وهو ما قراني
لو كان صحح خطابو
يعاود يريب ما باني
راه السواري كثير رطابو
مازال يامي فمكاني
واخا شعرات راسي شابو
نتسنى لعقلو يرجع ثاني
يحيدني من بين نيابو
گلبي فعشقو شيباني
يفديه بقوة شبابو
تعلاقي بيه صبياني
تيلاد بحبلو فجنابو
رشيد حياط .......14/06/2024
ليست هناك تعليقات:
إرسال تعليق