** عشنا وشفنا **
الـدمـع احـبـس فـالـعـيـن
واللـسـان بـلـع ريـقـو
الـقـلـب عـيـا بـالـدق
وشـكـون يـعـرف حـريـقـو
الـروح تـشـكـي وتــنــيــن
والـظـلـم مـشـمـر عـل الـيـديـن
مـغـمـض عـيـنـيـه وشـاد طـريـقـو
دار الـسـيـبة خـلـيـلــة
واخــتــار الـشـيـطان عـشـيـقـو
الـخـيـر سـافـر بـعـيـد
والـشـر جـمـع الـعـبـيـد
وفرق كيسان الغدر من بريقو
وحـال ابـنـادم صـبـح حزين
لا مــلــة لا ديــن
وطـبـايـعـو مـا بـقـاو يـلـيـقـو
عشنا حلاوة ليام
عشنا فسريرها
كان الخير طيفور
ما كان الماء ينشف من غديرها
كان اللسان ينطق بحلاوة الكلام
كان الكبير للصغير عناية
كان الرشوق فاللـمـة
ما كان الهتوف الخاوي
كنا نعرفو تدبيرها
كان الحب معمر المكان
مالي القلوب
كان تيساع الخاطر
كانت الشورة والمشاورة
ما كان حد يفكر فـتـدميرها
اليوم تخلطات
فشكوة خانزة تمخضات
ولاو ينكرو خيرها
عشنا حلاوة ليام
وعشنا فسريرها
عشنا وشفنا ويا مشفنا
ومن كثرة الشوف عدفنا
حرنا لين غادي يوصل مصيرها
كثر اللــغــط
فقص وولد فراقي
كثرو المشاورية
كل مشاوري عقلو ما صافي
قالوا همهم الدرويش
لكن باغيين غير يتوصلو وصافي
ذبحوا وسلخوا
وكانت الدبيحة بموس حافي
للي فراس الذيب
غناتو الذيبة بقوافي
قصدنا ناس العقل والحكمة
والناس للي عقلهم وافي
قالوا كيف ما قالي شوافي
تبن الصيف مصيرو اللطمة والعوافي
توفيق بومدين
